كفوف القذارة.

هذا وقت الحزم حان
ياعصوف الذل.. يكفينا عصوف
انتهي وقت الدلل والطبطبة فوق الكتوف
اعلنوها بإنطلاقة ..
اضووا شمعة في دجانا واشعلوا عتم الكهوف

اقطعوا ضرع الحليب..
هزوا مرهوف العــلاقة..
يكفي زيف الكذب واوهام الصداقة.
اغسلوا الكف البرية.. من قذارات الكفــوف

وانثروا عطر الطهارة .. في الملابس والرفوف

واغسلوا الراحة بسبع
واستعينـوا بالتراب  ..
من نجاسات  اللعاب
فانتم ادرى بالحكاية .. بين حدي .. والسيوف

اقلبوا وجه المراية..
والمحوا الصورة الجديدة.. يالمُناظر .. وش تشوف ?

ذعر في كل اتجاه
نار تحرق كل حي في الحياة
طفل يصرخ ااب يقتل ام تذبل شعب يفنى والمباني انهيار
موت اخـــلاق ومبادئ..
ياترى.. من هو ننــــادي ؟

العرب..
للاسف مافيه صوت !!

المسلمين..
موت ننعي دون موت!!

مجلس الامن..
كل ما يقرب يفوت

الامم المتفرقة..
شجب واستنكار  مقلق.. ثم يعقبه السكوت

طغاة الفيتو .. ليت تلغى هالكروت
استحوا
استحوا
ماعاد قطرة تنبض بعرق الكرامة ذاب وجهي من الكسوف

مابقي للعهد ذمة ..
ولابقي موقف مشرف .. يحتوينا في الصفوف

يكفي يالساسة مهـــازل كم ضربنا بالدفوف

كم مشينا ..
كم سعينا ..
خلف عصبة وَهَم كاذب .. مرة فزعة ومرة خوف !!

اي موقف؟
اي شجب .. اي صفعة بالخدود؟
اي انصاف انتمَنّا .. من كفوفك يالقذارة؟؟

اي نصرة ..؟
من عبيد المال خـُدّام المجوس
لو تصدق ..
من كلامي .. استحت بعض الحروف

ماحفظنا درس واحد .. قبل طيّب
وما فهمنا درس ثاني .. بعد سوف!!

مدوا ايديكم لبعض..
يكفي شتم .. ويكفي يالاحباب عض!!
كم على الباب انتسابق .. ماتعبنا من الوقوف..

تختلف فينا الظروف ..
تشتريهم بالمصــالح..
واحنا سلعة دم بارد..
الأيادي تبيع فينا بيع سارق للخروف

ويش باقي يالمصالح ؟
اللي كان الامس سكر .. في عيون اليوم مالح !!
يعني يكفي مالقينا من العزوف!!

اسمعوني ..
هذي فرصة اكسروا فيها المراية
واصنعوا لاحلامنا بعض الطيوف

كم قضينا من السنين ..
واحنا نُذبَح في  الضيافة
ودنا نكون المضيّـف..
ماكفانا ذا الزمن واحنا ضيوف

لوبغيتم ترسموا خط البداية
امسحوا العار القديم ..
وامنعوا كف التسول.. واقطعوا كفـوف القذارة ..
يانعيش بعز ظاهــر..
يانموت بميتة فيها نفاخر..
ولا نعيش بذي الحقارة ..  بين كيري ولافروف

اخسروا المال الوفير
واخسروا الفرش الوثير  واخسروا ذل الحقير
لا تهمون الخســـــــارة ..
بس .. دون اللمس .. في ذيك الكفــــوف

اضف تعليقك

لن يتم عرض بريدك الإلكتروني حقول مطلوبة *

*